ກອງປະຊຸມ ດຳເນີນຊີວິດການເມືອງເພື່ອຕີລາຄາຄຸນນະພາບຈັດແບ່ງປະເພດສະມາຊິກພັກ ແລະ ໜ່ວຍພັກປອດໃສເຂັ້ມແຂງ ໜັກແໜ້ນ ປະຈຳປີ 2024 ຂອງໜ່ວຍພັກຄະນະຄຸ້ມຄອງເຂດເສດຖະກິດພິເສດແຂວງບໍ່ແກ້ວ ໃນວັນທີ 3 ມັງກອນ 2025 ນິ້. ຢູ່ທີ່ຫ້ອງປະຊຸມ ອົງການຄຸ້ມຄອງບໍລິຫານເຂດເສດຖະກິດພິເສດ ສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ. ໂດຍການເປັນປະທານຂອງສະຫາຍ ບຸນທອງ ແສງສີກອງ ກຳມະການພັກແຂວງ, ຫົວໜ້າຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ,ມີ ສະຫາຍ ເຄື່ອນເພັດ ວົງຈັນ ຄະນະປະຈຳພັກແຂວງ ຮອງເຈົ້າແຂວງໆບໍ່ແກ້ວ,ມີບັນດາແຂກຖືກເຊີນ ມາຈາກກວດກາພັກ-ລັດແຂວງ, ຄະນະພັກ, ສະມາຊິກສົມບູນ-ສຳຮອງ ເຂົ້າຮ່ວມ.
ກອງປະຊຸມ ຄະນະຮັບຜິດຊອບໄດ້ເຜີຍແຜ່ ກົດລະບຽບພັກ ແລະ ເອກະສານສຳຄັນຕ່າງໆຂອງພັກ, ບົດສຳຫຼວດການນຳພາລວມຂອງໜ່ວຍພັກ ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ, ມີສະມາຊິກພັກທັງໝົດ 40 ສະຫາຍ,ຍິງ 5 ສະຫາຍ. ຜ່ານມາການສ້າງໜ່ວຍພັກປອດໄສເຂັ້ມແຂງໜັກແໜ້ນປະຈຳປີ 2024 ຄະນະໜ່ວຍພັກ ແມ່ນໄດ້ເອົາໃຈໃສ່ ຖືເອົາວຽກງານການສຶກສາອົບຮົມການເມືອງແນວຄິດ ເປັນສຳຄັນ,ໃນການສ້າງ ແລະ ປັບປຸງຕົນເອງຕາມ 5 ຫຼັກການ ແລະ 3 ທິດນຳຂອງພັກ ເອົາໃຈໃສ່ປັບປຸງດ້ານເນື້ອໃນ ແລະ ແບບແຜນວິທີນຳພາ, ວິທີເຮັດວຽກ ແລະ ການດຳເນີນຊີວິດການເມືອງເປັນປົກກະຕິຢ່າງຕໍ່ເນື່ອງ, ຄະນະໜ່ວຍພັກ, ສະມາຊິກພັກທຸກສະຫາຍ ໄດ້ມີສະຕິຕໍ່ການຈັດຕັ້ງ, ຕໍ່ລະບຽບວິໄນຂອງພັກ ກໍ່ຄືລະບຽບກົດໝາຍຂອງລັດ,ເປັນແບບຢ່າງນຳໜ້າໃຫ້ແກ່ມະຫາຊົນ, ມີຄວາມບຸກບືນຫ້າວຫັນຕໍ່ໜ້າທີ່ວຽກງານທີ່ໄດ້ຮັບການມອບໝາຍ ແລະ ມີຜົນສໍາເລັດ ກອງປະຊຸມ ສະມາຊິກພັກແຕ່ລະສະຫາຍໄດ້ຜ່ານບົດປະເມີນຜົນຂອງຕົນ, ອັນໄດ້ຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງ ແລະ ວິທີປັບປຸງແກ້ໄຂໃນສະເພາະໜ້າ. ໝູ່ຄະນະກໍ່ໄດ້ປະກອບຄຳຄິດ-ຄຳເຫັນ ເພື່ອຕຳນິສົ່ງຂ່າວກໍ່ສ້າງຊ່ວຍເຫຼືອເຊິ່ງກັນ ແລະ ກັນ, ແນໃສ່ເຮັດໃຫ້ແຕ່ລະສະຫາຍສະມາຊິກພັກມີທັດສະນະແນວຄິດ ແລະ ບາດກ້າວອັນໃໝ່ ໃນການຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກທີ່ດີເດັ່ນ-ເຂັ້ມແຂງໜັກແໜ້ນ, ເປັນກຳລັງແຮງໃຫ້ແກ່ ການສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນຂຶ້ນເລື້ອຍໆໃນຕໍ່ໜ້າ.
